Hrossabóndi finnur Kvenfyrirlitninginn

"loksins,“ segir Kári Stefánsson sem fann litninginn í gær

26.02.2013 - 11:06
Kvenfyrirlitningurinn sem vísindamenn um allan heim hafa leitað að er fundinn. Það var að sjálfsögðu okkar maður, Kári Stefánsson, sem fann litninginn, en eins og flestum er kunnugt er kvenfyrirlitningurinn talinn valda karlrembu.
 
Við náðum tali af Kára þar sem hann var að fagna fundinum með rúsínugraut á Borginni í hádeginu.
 
„Já, ég get staðfest að kvenfyrirlitningurinn er fundinn. Ég fann hann upp úr átta í gærkvöldi þar sem hann faldi sig á bak við x-litninginn.“

Hvaða aðferð beittirðu til að finna hann?

„Ég smitaði bara x-litninginn með klámvírus og þá blánaði kvenfyrirlitningurinn allur upp og sýndi sig.“

Hverju breytir þessi fundur Kári?

„Hann mun breyta miklu. Loksins, loksins, loksins getum við nú með einfaldri DNA-rannsókn séð hverjir bera kvenfyrirlitninginn í sér þannig að hér eftir verður ekki um það deilt.“

Telurðu að í framhaldinu verði hægt að lækna karlrembu?

„Já, ekki spurning.“

Þess má geta að í kjölfar fréttarinnar hefur mikill fögnuður brotist út á meðal andspyrnufemínista sem ætla að krefjast þess að allir karlar, nema þeir sem segjast vera femínistar, eru í VG eða á móti NATÓ og innrásum í önnur lönd, verði sem fyrst skikkaðir í kvenfyrirlitningaleit hjá Kára og síðan merktir með gulu.
 
grefillinn.com